(سبەی):
بەرهەم ساڵح لە خولی دوەمی دەنگدان بۆ هەڵبژاردنی سەرۆک کۆمار لە ئەنجومەنی نوێنەرانی عێراق توانی زۆرینەی دەنگ بەدەستبهێنێت و ببێت بە سەرۆک سەرۆک کۆماری عێراق.

کەمێک پێش ئێستا خولی دوەمی دەنگدان بۆ هەڵبژاردنی سەرۆک کۆماری عێراق بەڕێوەچو، بەرهەم ساڵحیش زۆرینەی دەنگی بەدەستهێنا و بو بە سەرۆک کۆمار.

لەخولی یەکەمی هەڵبژاردنەکەدا دوای ئەوەی هەریەکە لە کاندیدانی یەکێتی و پارتی و (18) کاندیدی دیکە رەتیان کردوە بکێشنەوە لە کێبڕکێکە، بەرهەم ساڵح توانی (165) دەنگ بەدەستبهێنێت و لەبەرامبەردا فوئاد حسێن (90) دەنگی بەدەستهێنا، بەوەش هیچ کام لەکاندیدەکان نەیانتوانی لە خولی یەکەم دەنگی پێویست بهێنن و دیاریکردنی سەرۆک کۆمار و هەڵبژاردنەکە کەوتە خولی دوەم و بەرهەم ساڵح توانی بە دەنگی (219) پەرلەمانتار ببێتە سەرۆک کۆماری عێراق و لەبەرامبەریشدا فوئاد حسێن (22) دەنگی بەدەستهێنا.

لای خۆیشییەوە هۆشیار عەبدوڵا، ئەندامی پەرلەمانی عێراق لە فراکسیۆنی گۆڕان رایگەیاند؛ ئەوان دەنگیان بە هیچ لە کاندیدەکان نەداوە و بەشێک نەبون لەو رێککەوتنە ژێربەژێرەی نێوان یەکێتی و پارتی، بەپێچەوانەوە ئەمڕۆ ئەو دو حیزبە نمونەیەکی زۆر ناشرینیان پێشکەش کرد.

ئەوە لەکاتێکدایە لە کاتى بەڕیوەچونى پرۆسەکە مەسعود بارزانى پەیامێکى توند و بەپەلەى دەرکرد و رایگەیاند؛ ئەو ئالیەتەى گیراوەتە بەر قابلی قبوڵ نیە و هەڵوێستیان دەبێت.