(سبەی):
بڕیارێكی دادگای تەمیز
لە هەولێر، سەدان دۆنم زەوی لە سلێمانی لە ژمارەیەک جوتیار وەردەگرێتەوە كە نزیكەی
دو سەدەیە خاوەندارێتی لەو زەوییانە دەكەن و دەیداتەوە بە كەسوكاری ئەو كەسانەی لەسەردەمی
بەعسدا، دەسەڵاتدار بون و بە بڕیاری بەعس، ئەو زەوییانەیان لەوكاتەدا وەرگرتوە.
دادگای تەمیز لەهەرێمی
كوردستان بڕیارێكی دەرکردوە لە بەرژەوەندی بەهادین ئەحمەد، سەرۆكی ئەنجومەنی یاسادانان
لەسەردەمی بەعس و شێخ جەعفەر شێخ عەبدولكەریم، پارێزگاری سلێمانی لە سەردەمی بەعس لە
ساڵانی (1980 تا 1988).
شێخ جەعفەر بەرزنجی
و بەهادین ئەحمەد كاتێك دەسەڵاتدار بون، باشوری كوردستان و پارێزگای سلێمانی بەتایبەت
روبەروی جینۆساید و هەمو جۆرێكی قڕكردن و توندوتیژی بوەتەوە. ئەم دو بەرپرسە كوردەی سەردەمی بەعس، بە بەكارهێنانی دەسەڵاتیان
لەو كاتەدا لەبەرامبەر زەوییەكانیان لە قەرەداغ و قادر كەرەم كە زەوی موحەرەمە
بون، سەدان دۆنم زەوییان لە سنوری شاری سلێمانی وەرگرتوە، كە خاوەنەكانیان ئەو جوتیارانە
بون كە لە باو و باپیرانیانەوە بە گرێبەستی كشتوكاڵی لەو زەوییانەدا ژیاون.
دواتر و كاتێك بەعس
روخا جوتیارەكان زەوییەكانی خۆیان وەرگرتەوە، بەڵام بەردەوام كەسوكاری بەهادین ئەحمەد
و شێخ جەعفەر هەوڵیانداوە ببنەوە بە خاوەنی ئەو زەوییانە و لە جوتیارەكانی وەربگرنەوە،
لە دواین هەوڵیشیاندا دادگای تەمیزی هەولێر لەبەرژەوەندی ئەوان بڕیاریداوە، لەكاتێكدا
دادگای سلێمانی بڕیارەكەی پێچەوانەی ئەوە بوە.
هاوکات ژمارەیەک
جوتیار و خاوەن زەوی، داوای راگرتنی ئەو بڕیارە نایاساییانە دەكەن و وەك خۆیان ئاماژەی
بۆ دەکەن، ئەو زەویانە لەسنوری ماستەر پلانی سلێمانیە ناكرێت قەرەبوی زەوی گوندێكی
قەرەداغ لەناوجەرگەی سلێمانی بكرێتەوە. هەروەک دەڵێن؛ كەی رەوایە كەسانێك
لە قەرەداغ و قادر كەرەم زەوییان هەبێت، لەسلێمانی قەرەبوبكرێنەوە بە زەوییەك كە
موڵکی ئەوان بوە.
جوتیارێک کە
لەدایکبوی ساڵی (1932)ە، دەڵێت: ئەم زەویانەی گوندی قولەرەیسی لەسەردەمی باوباپیرانمانەوە
بەدەست ئێمەوەیە.
یەكێكی تر لەو جوتیارانە
رایگەیاند؛ بڕیارەكەی دادگای تەمیزی هەولێر پێچەوانەی سەرجەم ئەو بڕیارانەیە كە لەسەردەمی
دو ئیدارەیی لە هەلێر و سلێمانی دراون و هاوتای بڕیارەكانی بەعسە.
لای خۆشیەوە، فریا
خدر، لێپرسراوی هۆبەی یاسای بەڕێوەبەرایەتی کشتوکاڵی سلێمانی وتی: "ئەو بڕیارەی
دادگای تەمیز پێچەوانەی بڕیارو رێنماییەكانی دادگای ئیستیئنافی سلێمانییە".
سلێمانی/
بڕیار نامیق