جیهان
12:24 - 08/12/2019
نەتەوە یەکگرتوەکان: چەکدارانى سەر بە تورکیا تاوانى جەنگ ئەنجام دەدەن
(سبەى):
نەتەوە یەکگرتوەکان هێرشى چەکدارە
بەکرێگیراوەکانى تورکیا بۆ سەر ناوچەى تەل رەفعەت لە باکورى سوریا بە
پێشێلکارییەکى مەترسیدار دادەنێت بۆ سەر مافەکانى مرۆڤ و بە تاوانى جەنگى
ناویدەبەن کە بە هۆیەوە چەندان منداڵ گیانیان لەدەستدا.
وتەبێژى ئەنجومەنى مافەکانى مرۆڤى سەر بە
نەتەوە یەکگرتوەکان چەکدارە بەکرێگیراوەکانى تورکیا تاوانبار دەکات لە ئەنجامدانى
پێشێلکارى و تاوانى جەنگ لە تەل رەفعەت کە بوە هۆى کوشتنى (12) کەسى مەدەنى و لە
نێوانیشیاندا هەشت منداڵ گیانیان لەدەستدا.
رۆبەرت کۆلفیل وتەبێژى نەتەوە یەکگرتوەکان
رایگەیاندوە: لە هێرشێکى چەکدارى بەکرێگیراوەکانى
تورکیا لە ناوچەکانى تەل رەفعەت لە نزیک قوتابخانەیەک (12) کەسى مەدەنى گیانیان لەدەستداوە و لە نێواناندا هەشت منداڵ
هەبون لە تەمەنەکانى سێ بۆ (15) ساڵدا".
ئەو وتەبێژى
ئاماژەى بۆ ئەوە کردوە؛ لە کاتى ئەنجامدانى رێککەوتنەکەوە لە نێوان ئەمەریکا و
تورکیادا، نەتەوە یەکگرتوەکان چەندین هێرش بە ئۆتۆمبێلى بۆمبڕێژکراو تۆمارکردوە
لەناو بازاڕەکان و ناوچەکانى نیشتەجێبونى هاوڵاتیاندا لە حەسەکە و رەققە و حەلەب.
وتوشیەتى:"
ئەم هێرشانە دەکرێت بچنە ئاستى هێرشى هەڕەمەکى و پێشێلکردنى یاسا نێودەوڵەتییەکان
و دەچێتە چوارچێوەى ئەنجامدانى تاوانى جەنگى".