دادگا بە یەکەم دامەزراوەى گەل دادەنرێت بۆ
پاراستنی ماف و کەرامەت و شکۆى مرۆڤانەى خۆى، گەل پەنا بۆ ئەم دامەزراوەیە دەبات و
ئەم دەزگایە سیمبولى شکۆى دەوڵەتە و هاوڵاتیان لێرەوە سەنگ و قورسایی دەوڵەتەکەیان
دەبینن، داد و دادگەرییە وادەکات هاوڵاتى دەست بە نیشتیمانەکەیەوە بگرێت.
دەوڵەتى نوێى مۆدێرن بە سروشتى خۆى دەسەڵاتێکى
دادوەریى سەربەخۆ دادەمەزرێنێت، ئەویش لەپێناو پاراستن و دڵنیاکردنەوەى هاوڵاتیان
و چەسپاندنى پرەنسیپەکانى دادگەریی و کۆنتڕۆڵکردنى ناڕەوایی و روبەڕوبونەوەى
ستەمکاریی.
چونکە دەوڵەت بەردەوام دەبێت تا ئەوکاتەى
لە ئاسمانیدا ئاڵاى داد و یەکسانیى بشەکێتەوە، وەک وتراوە (دادگەریى بنەماى حکومڕانییە)
لەسایەى دادگەریدا پیشکەوتن و خۆشگوزەرانى لە کۆمەڵگاکاندا دروستدەبێت و تواناکان
بەرە و پێشدەچن و تاکەکان پێشبڕکێى یەکتر دەکەن لەپێناو پێشخستنى وڵات و بونیادنان
و بەهێزکردنى.
چونکە دادوەریی لە بابەتە سەرەکیەکانە بۆ
هەر دەوڵەتێکى سەربەخۆ و ئارام و سیستمە راستەقینەکان هەوڵى چەسپاندنى دادگاى
سەربەخۆ و بەهێز دەدەن، کەسانى باش و شایستە و ئازا دەخەنە ئەم دەزگایانەوە، چونکە
دادگا ئەو دەسەڵاتەیە رژێمى بەڕێوەبردن و هاونیشتیمانى وەک یەک دەپارێزێت.
تێکچونى باڵانسی دادوەریی بەماناى تێکچونى
جومگە راگرەکانى کۆمەڵگا و دەوڵەت دێت، سستبونى ئەم جومگانە لە کۆتاییدا دەبێتە
هۆى داڕمانى هەرجۆرە سیستم و حوکمڕانەیەک، چونکە بە نەبونى سیستمێکى دادگەریى باش
ئەو دەوڵەتە یەکەم شت کە لە دەستى دەدات شەرعیەتە، لە رێگەى سیستمێکى دادوەریی
دامەزراو لەسەر یەکسانى و دادگەریی تێرو تەواو لە نێوان هاونیشتیمانیانیدا نەبێت،
ئەوا هیچ دەوڵەتێک ناتوانێت شەرعییەتى بونى خۆى لە هیچ رێگەیەکى ترەوە بەدەستبهێنێت.
لەحاڵەتى شێوانى وێنەى دادگا و گەندەڵبونى
هەندێک لە بەشەکانى، ئەمە دەبێتە هۆى تێکچونى وێنەى سیستم و لەدەستدانى رێزو شکۆى،
ئەمەش وادەکات بانگەواز بۆ هەڵگەڕانەوە دژ بەو رژێمە سەرهەڵبدات.
لەحاڵەتى نەمانى دادگەریى و یەکسانیى و زۆربونى
وێنەو شێوازەکانى ستەم و نابەرابەریی، ئەوا دەسەڵاتەکان دەگەڕێن بۆ شتێک تا خۆیانى
پێ بپارێزن لەم کاتەشدا هیچ شک نابەن جگە لە توندوتیژى و زەبر و زەنگ و چارەسەرە
ئەمنیەکان نەبێت، ئەم جۆرە دەسەڵاتانە بەداخەوە لەبرى ئەنجامدانى چاکسازى لە دەزگا
دادوەریەکەیدا هەوڵى ملکەچکردنى هاونیشتیمانیانى دەدات و دەیانباتە بەردەم دادگەریەکى
ساختە و شێوێنراو، دەیانخاتە بەردەم ستەمکارییەکى دەمامکدار بە کۆمەڵێک بڕیارى دادگاییانەى گەندەڵ و خراپ.
ئەمەش وادەکات بارودۆخ نەک باش نابێت،
بەڵکو کێشە و گرفتەکان و سکاڵاکانى هاوڵاتیان سات بەسات زیاتر ببن، ترس زیاد بکات و
چەوساندنەوە بڵاو بێتەوە، لەگەڵ ئەمەدا ئارامى و سەقامگیریش لەناودەچێت و پشێوى
بڵاو دەبێتەوە، فەیلەسوف و کۆمەڵناسى گەورە ئیبن خەلدون لە کتێبە بەناوبانگەکەیدا
باس ئەمەى کردوە و دەڵێت: "گەندەڵبونى دادوەریی دەرەنجامەکەى روخانى
دەوڵەتانە " هەروەها دەڵێت: ستەم ئاماژەى وێرانبونى وڵاتانە.
بەڵێ گەندەڵبونى دادگا، واتە گەندەڵبونى
حوکمڕانى و گەندەڵبونى سیاسەت و ئابورى و وەبەرهێنان و بازرگانى و پاشان خراپبون و
تێکچونى پەروەردە و پەروەرکاران و لێرەشەوە گەندەڵبونى کۆمەڵگا و بۆگەنکردنى،
لەناوچونى ئەخلاق و هەڵوەشانەوەى خێزان، بە مانایەکى وردتر گەندەڵبونى دادگا
سەرچاوەى هەمو خراپیەکانە، چونکە دادگا ئەو لایەنەیە کە پاراستنى ماف و راگرتنى
باڵانس و پاراستنى خەڵکەکە و ماڵ و موڵکیانى لەسەر بەندە .
ئەگەر دەسەڵاتى دادوەرى تێکچو، ئەوا دەبێتە
هۆکارى تێکچونى هەمو بەشەکانى دیکە و دەوڵەت دەبێتە شوێنى ستەم و ناڕەوایەتى، مەحسوبیەت
و جیاکاریی، ئەمەش سەرچاوەى گەندەڵیى و فەساد و تێکچونى بارودۆخ و فەوزا و پشێویە.
چونکە ئەگەر کەسەکان بێ خەمبون لە
لێپرسینەوە ئەوا پیشەکانیان بەخراپترین شێوە بۆ بەرژەوەندى خۆیان بەکاردەهێنن، چونکە
ئەوان لەوە تێگەیشتون دادوەرەکە نرخەکەى دیارى کراوە و زانراوە و دەتوانیت بە چەند
دینارێک بیکڕیت، چەند پیسیشە ئەو کەسەى نرخى خۆى هەڕاج دەکات، هەر نرخێکیش لەبرى
بیربڕوا بدرێت نرخێکى هەرزانە، ئەگەر زۆریش بێت.
وەرگێڕانى: عەبدوڵا رێشاوى
سەرچاوە :مالپەڕى ئەلجەزیرە