(سبەى):
لەشکر حەمید، سەرۆکى لیژنە هاوبەشەکانى
قائیمقامیەتى سلێمانى لە دیمانەیەکدا لەگەڵ (سبەى) ئاماژە بە کار و ئەرکى
لیژنەکانیان دەکات لە بەدواداچون بۆ فرۆشگا و خواردنگە و شوێنە گشتییەکان و ئەوە
دەخاتەڕو کە ئەولەویەتیان لە ئیستادا پابەندکردنى شوێنەکانە بە رێنمایى و
رێکارەکانى خۆپارێزى و لەگەڵ ئەوەشدا لێپێچینەوە لە بونى هەر خۆراک و کاڵایەکى
بەسەرچو دەکەن.
دەشڵێت: "لە (15) رۆژى رابردودا لەلایەن
لیژنە هاوبەشەکانەوە دەست بەسەر زیاتر لە (17) تەن خۆراک و کاڵاى بەسەرچو گیراوە و
لەناوبراون، رێکارى یاساییش بەرامبەر ئەو شوێنانە گیراوەتە بەر کە خۆراک و کاڵاى بەسەرچویان
هەبوە، لە هەردو مانکى (9 و 10)ى ئەمساڵیشدا (11) هەزار بەسەرکردنەوەمان هەبوە و
لە ئەنجامیدا زیاتر لە (300) پسوڵەى سەرپێچیمان کردوە".
* چەند لیژنەتان هەیە و چۆن ئەرکەکانیان
دابەشکراوە بۆ چاودێریکردنى نرخ و فرۆشگا و ئەو شوێنانەى پێویستە لەژێر چاودێرى بازرگانى
و تەندروستیدا بن؟
لەشکر حەمید: ئێمە وەک لیژنە هاوبەشەکانى
قائیمقامیەتى سلێمانى (38) تیممان هەیە، بەپێى پسپۆڕییان رۆژانە لە پێنجى
بەیانییەوە ئەرکەکانیان دەستپێدەکات بە مەبەست و ئامانجى بەدواداچون بۆ شوێنەکان و
تا سەعات (1:00)ى شەو کارەکانى لیژنەکان بەردەوام دەبێت بە پێى پسپۆڕى و ئەرکەکانیان
سەردانى شوێنە گشتیەکان دەکات و هەمو ئەو رێکارانەى پێویستە پێوەى پابەند بن لەروى
تەندروستى و سەمەتى و کشوکالى و سوتەمەنى و بیناسازى سەلامەتى.
لەو کاتەشەوە کە پەتاى کۆرۆنا سەرى هەڵداوە
و بڵاوبوەتەوە، کارى لە پێشینەى لیژنەکانمان بەدواداچون و لێپێچینەوەیە بە ئامانجى
جێبەجێکردنى رێنمایى و رێکارەکانى خۆپارێزى، رێنماییان دەدەنێ ئەگەر پابەند نەبون
ئاگادار دەکرێنەوە لەکاتى چەند بارەکردنەوەى غەرامە دەکرێن و دواتریش لێپێچینەوەى
یاساییان بەرامبەر دەگیرێتە بەر.
* زۆرن ئەو حاڵەتانەى لیژنەکانى ئێوە
دەستیان بەسەردا دەگیرێن لە بەکارهێنان و فرۆشتنى ئەو خۆراکانەى بەسەرچون یان
خراپبون، هۆکارى ئەوە چیە؟
لەشکر حەمید: بەداخەوە، لە چەند رۆژى
رابردودا ئێوە لەگەڵ تیمەکانماندا بون کە دەستمان بەسەر جگەر و گۆشتى هاوردەدا
گرت، جگەر و گۆشتى بەستوى هاوردە لە ساڵى (2007)ەوە قەدەغە کراوە، چونکە رێژەیەکى
زۆر مەوادى حافیزەى تێدایە و رێگە پێنەدراوە، بەڵام بە شێوازى نایاساى دەهێنرێتە
هەرێمى کوردستان و شارى سلێمانیش و لەلایەن هەندێک فرۆشگا و خواردنگەوە بەکاردەهێنرێن.
نرخى جگەرى هاوردەکراوى مریشک، دو بۆ سێ
هەزار دینارە، بەڵام نرخى جگەرى رێگەپێدراو و فرێشى خۆماڵى (12 بۆ 13) هەزار
دینارە، بۆیە بەداخەوە لەلایەن هەندێک فرۆشگا و خواردەمەنییەوە بەکاردەهێنرێت و
دەدرێتە کڕیاران. بەو پێیەى کە ئەو جگەر و گۆشتانە قەدەغەکراون ئەو شوێنانەى
بەکاریان دەهێنن لە شوێنى ناتەندروست و دور لە چاوى لیژنەکان هەڵیان دەگرن، بۆیە
ئێمە رۆژانە بەدواداچونى ورد دەکەین بۆ ئەو بوارە و لە هەر شوێنێک دەستیان بەسەردا
بگرین لێپێچینەوەیان لەگەڵدا دەکەین.
* باسى ئەو فرۆشگایەت کرد کە هەفتەى رابردو
تێیدا دەستتان بەسەر جگەر و گۆشتى بەستوى قەدەغەکراودا گرت، چ رێکارێک بەرامبەر
خاوەنەکەى دەگیرێتە بەر؟
لەشکر حەمید: دەست بەسەر ئەو بڕە جگەر و
گۆشتەدا گیرا کە لە دوکانەکەدابو، خواردنگەکەشى داخرا و لەلایەن بەشى یاسایى
قائیمقامیەتیشەوە سكاڵاى یاسایى لەسەر تۆمار دەکەین و خاوەنەکەى دەدەینە دادگا.
* جگە لە خواردنگەکان، زۆرێک بژێویان لەسەر
فرۆشتنى خواردنە لەسەر عەرەبانە و دەستگێڕن، ئەوانە تا چەند تەندروستن، ئایا
لەکاتى سەرپێچیدا لێپێچینەوە لەوانیش دەکەن؟
لەشکر حەمید: لەبەر ئەوەى ئەوان مۆڵەتى
رەسمى لایەنى پەیوەندیداریان نییە، ئێمە تەنها دەتوانین لە رێکارەکان بەرامبەریان
لەکاتى سەرپێچیدا تەنها خواردنەکەیان دەستى بەسەردا بگرین و تەلەفى بکەین،
ناتوانین پسولەى سەرپێچیان بکەین، بەڵام من وەک نوێنەرى بەڕێوەبەرایەتى تەندروستى
دەڵێم ئەو خۆراکانەى لە دەستگێڕەکان دەفرۆشرێن مەرجى تەندروستى و سەلامەتى نییە
چونکە داخراو نیە و سارد کەرەوە و دەستشۆرى تێدا نییە بەشێکیان شەوان لە شوێنى
کراوە و دەرەوە جێدەهێڵرێن.
بۆیە داوا لە هاوڵاتیان دەکەم تا
دەتوانن خواردەمەنى دەستگێڕەکان بەکار نەهێنێنن.
* ماوەیەکە دواى ئەو قسەوباسەى لەسەر
ئەو گۆشت و مریشکە کرا کە لەسەر سینى و لە بەشێک دوکانەکان بە نرخى فرێش
دەفرۆشرێن، گومان و دودڵى دروست بوە لاى هاوڵاتیان، ئایا متمانە بە چ گۆشت و
مریشکێک بکرێت؟
لەشکر حەمید: بەشێکى زۆرى ئەوەى هەیە
تەندروستە، بەڵام بەداخەوە لەماوەى چەند رۆژى رابردو لە ئەنجامى ئەو بەدواداچون و
پشکنینانە ئەنجاممانداوە (15) پسوڵەى سەرپێچیمان کردوە بۆ ئەو مریشک فرۆش و
دوکاندارانەى مریشکیان لەسەر سینى داناوە و بەناوى مریشکى فرێشەوە دەیفرۆشن، بەڵام
بەشێکیان مریشکى بەستون و خاوکراونەتەوە، بۆیە لێپێچینەوە لەگەڵ خاوەن دوکانەکان
دەکەین.
داواکارین هاوڵاتیان لەو شوێنانە مریشکى
فرێش بکڕن کە مۆڵەتى تەندروستى و ڤێتەرنەریان هەیە، ئەگەر مریشکى بەستوشیان کڕى خۆیان
خاوى بکەنەوە و ئامادەى بکەن، بەهیچ شێوەیەک ئەو مریشکانە نەکڕن کە لەسەر سیسنى
دانراون چونکە هەندێکیان غەشیان تێداکراوە و مریشکى بەستون و بەناوى فرێش
دەفرۆشرێن.
* لەماوەى 15 رۆژى رابردودا دەستتان
بەسەر چەند تەن خۆراکى بەسەرچودا گرتووە؟
لەشکر حەمید: لە (15) رۆژى رابردودا لەلایەن
لیژنە هاوبەشەکانەوە دەست بەسەر زیاتر لە (17) تەن خۆراک و کاڵاى بەسەر چو گیراوە
و تەلەف کراون، رێکارى یاساییش بەرامبەر ئەو شوێنانە گیراوەتە بەر کە شتى
بەسەرچویان هەبوە.
تەنها لەماوەى ئەو (15) رۆژەشدا لەرێگەى
سەرجەم لیژنەکانمانەوە زیاتر لە (سێ) هەزار و (500) سەردانمان کردوە بۆ شوێنە
گشتیەکان لە سلێمانى، لە هەردو مانکى (9 و 10)ى ئەمساڵ (11) هەزار بەسەرکردنەوەمان
هەبوە و لە ئەنجامیدا زیاتر لە (300) پسوڵەى سەرپێچیمان کردوە، زیاتر لە (250)
پسوڵەى ئاگادارکردنەوەشمان کردوە.
شێوازى کارى ئێمە ئەوەیە ئەگەر شوێنێک
تازە کرابێتەوە و ئاگادارى رێنمایى و رێکارەکان نەبێت، تەواوى رێنماییەکانى
پێدەڵێین، دواى ئەوە ئەگەر شوێنەکە سەرپێچى کرد پسوڵەى ئاگادارکردنەوەى بۆ دەکرێت
و غەرامە دەکرێت، بەڵام ئەگەر جارێکى دیکە سەرپێچى بکات یان شتى بەسەرچوى هەبێت
راستەوخۆ سکاڵاى یاسایى لەسەر تۆمار دەکەین.