(سبەى):

دامەزراوەیەكی دیاری ئەمەریكی تایبەت بە لێكۆڵینەوە داوا لە حكومەتی ئەو وڵاتە دەكات بەپلەی یەكەم گرنگی بدات بە بواری پەرەپێدان و "حكومڕانیی باش" لە رۆژهەڵاتی ناوەڕاست لەبری ئەوەی گرنگی بدات بە بواری ئەمنی و ئاسایش.

راپۆرتەكەی دامەزراوەی (RAND) باس لەوە دەكات كە ویلایەتە یەكگرتوەكانی ئەمەریكا پێویستی بەوەیە دوبارە هاوسەنگیی هێز لەبارەی پشتیوانییەكانی خۆی بۆ ناوچەی پڕكێشمەكێشمی رۆژهەڵاتی ناوەڕاست رێكبخاتەوە و ئاماژە بەوەشكراوە كە ئیسرائیل و میسر و ئوردن لە ساڵی (2019)دا، (81%)ی پشتیوانییە سەربازییەكانی ئەمەریكایان بەدەستگەیشتوە و ئەوەدەخاتەڕو کە سیاسەتی ئەمەریكا بۆ رۆژهەڵاتی ناوەڕاست بەسەرچوە و بەزۆری تیشكی خستوەتە سەر فرۆشتنی چەك و پرسی ئێران.

لە بەرامبەردا دامەزراوەی (RAND) پێشنیاری ئەوە دەكات كە ئەولەویەت بدرێتە وەبەرهێنانی ئابوری و حكومڕانی و دیپلۆماسی و پرۆگرامەكانی تایبەت بە خەڵك.

راپۆرتەكە پێیوایە؛ پشتیوانییە سەربازییەكانی ئەمەریكا، كە زۆر لە پشتیوانییە ئابورییەكان لەپێشترە، نەبوەتەهۆی بەرجەستەبونی پڕۆسەی ئاشتی لە رۆژهەڵاتی ناوەڕاست و سەرەڕای سزا توندەكان، راپۆرتەكە ئاماژەی بە مەترسی و هەڕەشەی پرسی ئەتۆمیی ئێران كردوە. هەروەها ئاماژە بەوەشكراوە كە هەبونی بەردەوامی داعش، هۆكارەكەی بریتییە لە زوڵم و ستەمی ئابوری و دەستەجەمعی كە ئەوەش بوەتە هۆی خوڵقاندنی مۆڵگەی چەكداران.

دامەزراوەی (RAND) پێشنیاری كەمكردنەوەی جیاوازی و كەلێنی پشتیوانی دەكات لەنێوان ئیسرائیل و میسر و ئوردن لەلایەك و وڵاتانی دیكە لەلایەكی تر، لەبری ئەوەش وەبەرهێنان زیاد بكرێت لە بوارەكان تەندروستی و رەخساندنی هەلی كار بۆ گەنجان و گۆڕانكارییەكانی كەشوهەوا. لەسەروی هەموشیەوە، راپۆرتەكە پشتیوانی لەوە دەكات كە گرنگی بدرێت بە وەبەرهێنانی ئابوری و مافی مرۆڤ و دژایەتیكردنی تونددڕەوی بەشێواز ناتوندوتیژی.

دالیا داسا یەكێك لە نوسەرانی راپۆرتەكە كە لێكۆڵیارێكی سیاسی دیارە لە دامەزراوەی (RAND) دەڵێت: "پێویستە بیر بكەینەوە لەبارەی ئەوەی بۆچی لەم هەرێمەین، نەك ئەوەی دژایەتی كێ دەكەین."

سەرچاوە: ئەلمۆنیتەر
لە ئینگلیزییەوە: فەلاح حەسەن